СОНСГОЛЫН БЭРХШЭЭЛТЭЙ СУРАЛЦАГЧДАД CHROMEBOOK, GOOGLE ХЭРЭГСЛИЙГ АШИГЛАХ ТАЛААР СУРГАЛТ ЗОХИОН БАЙГУУЛЛАА

“Боловсролын Дэлхийн Түншлэл” олон улсын байгууллага нь Монгол Улсын боловсролын салбарын хөгжлийн дунд хугацааны төлөвлөгөө /2020-2030/-г хэрэгжүүлэхэд дэмжлэг үзүүлж, ерөнхий боловсролын чанар, хүртээмжийг сайжруулах зорилгоор “Тэгш боломжийг бүрдүүлэх замаар суралцахуйг дэмжих” (EQUAL) төслийг 2022-2025 онд 3 жилийн хугацаатай хэрэгжүүлж байна. “Тэгш боломжийг бүрдүүлэх замаар суралцахуйг дэмжих” EQUAL төслийн 2025 үйл ажиллагааны төлөвлөгөөний 3.1.5-д “Хэл яриа сонсголын бэрхшээлтэй суралцагчдад зориулсан туслах хэрэглэгдэхүүний тохируулга хийх” ажлыг төлөвлөсөн. Энэхүү ажлын хүрээнд “Сонсголын бэрхшээлтэй суралцагчдад зориулсан туслах хэрэглэгдэхүүний тохируулга хийх” ажлын хэсгийг Боловсролын яамны төрийн нарийн бичгийн даргын тушаалаар Боловсролын яам, Боловсролын судалгааны үндэсний хүрээлэн, олон улсын байгууллага, төрийн бус байгууллага, ерөнхий боловсролын сургуулийн төлөөллөөр байгуулсан.

Сонсголын бэрхшээлтэй суралцагч ерөнхий боловсролын сургуульд технологийн тусламжтай тэгш хамран суралцах боломжийг бүрдүүлэх зорилгын хүрээнд Chromebook, Google хэрэгслийг сургалт, үйл ажиллагаанд хэрэглэхэд зориулсан чадавх бэхжүүлэх сургалтыг нийслэлийн 29 дүгээр сургууль дээр 2025 оны 11 сарын 07-ны өдрөөс 11 сарын 14-ний өдрүүдэд Боловсролын судалгааны үндэсний хүрээлэн Google for Mongolia-тай хамтран зохион байгууллаа.

Сургалтад нийслэлийн ерөнхий боловсролын 29 дүгээр сургууль, 16 дугаар сургууль, 181 дүгээр сургууль, Увс аймгийн Улаангом сумын 1, 2 дугаар сургуульд суралцаж байгаа сонсголын бэрхшээлтэй суралцагчдын төлөөлөл, тэдний багш, эцэг, эх, асран хамгаалагчид оролцлоо.

Сургалтын агуулга нь Chromebook компьютер, Google хэрэгслийг багш нар сургалт, үйл ажиллагаандаа хэрэглэх арга зүй эзэмших, суралцагч, эцэг эх, асран хамгаалагчид технологиор дамжуулан багштай харилцах боломжийг бий болгоход оршино.