МОНГОЛ ХЭЛНИЙ БАГШ НАРЫН ЗӨВЛӨГӨӨН ЗУРГААН БҮСЭД АМЖИЛТТАЙ ЗОХИОН БАЙГУУЛАГДЛАА
Монгол Улсын Ерөнхийлөгчийн ивээл дор “ЭХ ХЭЛ-НЭГ МОНГОЛ” монгол хэлний багш нарын бүсийн зөвлөгөөнийг 2026 оны аравдугаар сарын 13, 15-ны өдрүүдэд зургаан бүсэд амжилттай зохион байгуулагдлаа. Бүсийн зөвлөгөөнд 21 аймгийн бүх түвшний сургалтын байгууллагын 700 гаруй төлөөлөл оролцлоо.
Зөвлөгөөний зорилго нь монгол хэл, үндэсний бичиг, уран зохиолын боловсролын чанар, хүртээмж, үр нөлөөг дээшлүүлэхэд тулгамдаж буй асуудал, сайн туршлагыг хэлэлцэж, сургалтын хөтөлбөр, сурах бичиг, багшийн хөгжил, судалгаа, технологи, унших соёлын уялдааг хангасан бодлогын санал, зөвлөмж боловсруулахад чиглэлээ.
Бүсийн зөвлөгөөнийг гурван салбар хуралдаанаар зохион байгуулж, оролцогчид өөрсдийн туршлага, ажиглалт, бодит нөхцөл байдалд тулгуурлан тулгамдсан асуудал, түүний шалтгаан, шийдвэрлэх боломжийг хэлэлцсэнээрээ онцлог байлаа.
Нэгдүгээр салбар хуралдаан: Монгол хэл, үндэсний бичиг, уран зохиолын сургалтын хөтөлбөр, сурах бичиг. Сургалтын хөтөлбөрийн хэрэгжилт, агуулга, арга зүй, үнэлгээ, сургалтын орчин, хэрэглэгдэхүүний асуудлыг сургуулийн өмнөх, бага, суурь, бүрэн дунд боловсролын түвшнээр авч үзэж, суралцагчийн хэл яриа, унших, бичих чадварыг хөгжүүлэх, боловсролын түвшин хоорондын залгамж холбоог сайжруулах санал дэвшүүллээ.
Хоёрдугаар салбар хуралдаан: Монгол хэл, бичиг, уран зохиолын багшийн хөгжил. СӨБ, бага боловсролын багш, монгол хэл, уран зохиолын багшийн хөгжилд багш бэлтгэх тогтолцоо, ажлын байрны уялдаа, мэргэжлийн тасралтгүй хөгжлийн нөхцөл, багшийн ажлын ачаалал, шаардлагатай ур чадварыг хөгжүүлэх асуудлыг тэргүүлэх чиглэл болгон авч үзэх шаардлагатайг онцлон тэмдэглэлээ.
Гуравдугаар салбар хуралдаан: Монгол хүүхдийн эх хэлний боловсролын өнөөгийн нөхцөл байдал, тулгамдсан асуудал, шийдэл. Хүүхдийн эх хэлний хөгжилд нөлөөлж буй гэр бүлийн орчин, унших орчин ба дадал, цахим хэрэглээ, хүүхдэд зориулсан монгол хэл дээрх контент, эх хэлээ хэрэглэх орчин, боломжийг хэлэлцэж, сургуулийн өмнөхөөс бүрэн дунд боловсрол хүртэлх түвшинд хэрэгжүүлэх боломжтой санал, шийдлийг боловсрууллаа.
Бүсийн зөвлөгөөн багш нарын дуу хоолой, мэргэжлийн туршлага, бүс нутгийн хэрэгцээг бодлого, шийдвэр боловсруулах үйл явцтай холбох, эх хэлний боловсролын асуудлыг олон талын оролцоотойгоор хэлэлцэх чухал талбар боллоо.
Тус зөвлөгөөнөөс гарсан санал, зөвлөмжийг нэгтгэн, монгол хүүхдийн эх хэлний боловсролын чанар, үр өгөөжийг дээшлүүлэх, түвшин бүрийн сургалтын хөтөлбөрийн хэрэгжилтийг дэмжих, багшийн хөгжлийг сайжруулах, монгол хэл, үндэсний бичиг, уран зохиолын сургалтын залгамж холбоог бэхжүүлэх цаашдын бодлого, үйл ажиллагаанд ашиглах юм.
