Боловсролын судалгааны үндэсний хүрээлэн 1956 онд үүсэн байгуулагдаж, эрдэм шинжилгээ, боловсрол, сургалт-арга зүйн ажлыг тасралтгүй 70 орчим жил үр дүнтэй явуулж буй манай улсын эрдэм судлалын ууган байгууллагуудын нэг билээ. Тэр үеэс хойш өнөөг хүртэл Монгол Улсын сургуулийн өмнөх, бага, дунд, мэргэжлийн болон дээд боловсролын тогтолцоог боловсронгуй болгох, шинэчлэн сайжруулахад гол чиглүүлэг залуур болж, бүх түвшний боловсролын сургалтын агуулга, арга зүй, үнэлгээ, сургалтын орчин, сурах бичгийн шинжлэх ухааны үндэслэлийг судлан боловсруулах, багшийн мэргэжил дээшлүүлэх, хүүхэд өсвөр үе, залуучууд, иргэд, олон нийтийг соён гэгээрүүлэх үйл хэрэгт чухал хувь нэмэр оруулж байсныг онцлон тэмдэглэж байна.
Түүнчлэн шинэ зууны боловсролын үзэл санаа, өөрчлөлтийн чиг хандлага, тавигдаж буй шаардлага, шинэчлэн батлагдсан хууль эрх зүйн хүрээнд манай хүрээлэнгийн бүтэц-зохион байгуулалт, үндсэн үйл ажиллагаа, чиг үүрэг улам боловсронгуй болж, нарийвчлагдаж байна.
Үүний тод жишээ бол манай хүрээлэн нь Монгол Улсын боловсролын хөгжлийн бодлого боловсруулах, шийдвэр гаргахад судалгааны мэдээллээр хангах, нотолгоонд суурилсан салбарын бодлого төлөвлөлт, эдийн засаг, менежмент, хүний хөгжил болон сургалтын хөтөлбөр, үнэлгээ, сурах бичиг сургалтын хэрэглэгдэхүүн, боловсролын ирээдүйн хөгжлийн чиг хандлагын чиглэлээр суурь болон хавсарга судалгаа-шинжилгээ, инновац, арга зүйн ажил эрхлэх, байгууллага, иргэд, олон нийтэд судалгаа, шинжилгээний үр дүнгийн мэдээллээр хангах замаар хүний хөгжилд хувь нэмэр оруулахад гол зорилго оршиж байгаа болно.
Монгол Улсын боловсролыг ойрын жилүүдэд Дэлхийн хөгжилтэй улс орнуудын боловсролын хөгжлийн жишигт ойртуулж, тухайн түвшинд хүргэх үйл хэрэгт Боловсролын судалгааны үндэсний хүрээлэн судалгаа, шинжилгээ, хүний нөөц, материаллаг болон үйлийн орчин, дотоод, гадаад хамтын ажиллагаа, түншлэлийг эрчимжүүлэн хөгжүүлэх замаар цаашид өндөр бүтээмж, санаачилгатай ажиллах болно.
Эрдэм боловсрол, шинжлэх ухааны төлөө хамтран ажиллагч, түншлэгч Эрхэм хүндэт Та бүхэн болон Боловсролын судалгааны үндэсний хүрээлэнгийн хамт олонд хамгийн сайн сайхныг хүсэн ерөөе.
Боловсролын шинжлэх ухааны судалгаа, инноваци цэцэглэн хөгжих болтугай.
Хүндэтгэсэн:
Захирал П.Оюунаа