ҮГИЙН САНГИЙН СУДАЛГААНЫ ХЭЛЭЛЦҮҮЛЭГ ЗОХИОН БАЙГУУЛАГДАЖ БАЙНА

Монгол Улсын “Алсын хараа-2050” урт хугацааны хөгжлийн бодлогын баримт бичигт "Хүн бүрийн эх хэлний боловсролыг дээшлүүлж, бүх шатны сургалтын байгууллагад монгол хэл, бичгийн боловсролыг суралцагчдад чанартай эзэмшүүлнэ”, “Мэдлэг шингэсэн монгол хэлний орчин бүрдэж, монгол хэлний үгсийн баялаг санг хамгаалах сан хөмрөг бий болно" гэсэн стратегийн зорилтууд дэвшүүлсэн. Уг зорилтод хүрэхийн тулд хүүхдийн үгийн сангийн нөөцийг тогтоож, академик үгийн хэрэглээг тодорхойлох зайлшгүй шаардлагатай байна.

Тиймээс Боловсролын судалгааны үндэсний хүрээлэнгийн санаачилгаар, Боловсролын сайд Л.Энх-Амгалангийн дэмжлэгтэйгээр сургуулийн өмнөх болон ерөнхий боловсролын сургуулийн бага дунд ахлах ангийн сурагчдад зориулсан академик болон соёлын үгийн, олон хэлний орчинд монгол хэл сурч буй хүүхдүүдэд зориулсан А, В, С түвшний үгийн жагсаалт гаргаж, зураг болон аудио дуудлага бүхий тайлбар толь бичиг боловсруулан хэрэглээнд оруулах зорилгоор эхлүүлсэн “Хүүхдийн академик үгийн нөөцийг тогтоож, түвшинд оноох судалгаа”-ны I үе шатны баталгаажилтын ажлын дүнг хэлэлцүүлж байна.

Өнөөдөр хэлэлцэх үгийн жагсаалт нь энэ толь бичгийн үндэс, тулгуур болох бөгөөд монгол хэлний дархлааг бэхжүүлэхэд чухал үүрэгтэй. Мөн хүүхдэд хэлний болон суралцахуйн бэрхшээл үүсэхээс сэргийлж, шинжлэх ухааны хэлний чадварыг өсгөхөд тустай. Тогтолцоо бүхий үгийн жагсаалт нь цаашид сургалтын хөтөлбөр болон сурах бичиг боловсруулах үндэс болно.

Судалгааны ажлын эрдэм шинжилгээний ач холбогдол:

• Хүүхдийн үгийн нөөцийн мэдээллийн сан бий болно

• Боловсролын хэлний онол, арга зүй хөгжинэ

• Мэдлэг шингэсэн монгол хэлний үгийн санг системчилнэ

• Үгийн сангийн өөрчлөлтийг судлах арга хэрэгсэл боловсронгуй болно

Судалгааны ажлын практик ач холбогдол:

• Бүх түвшний сургалтын хөтөлбөр, сурах бичгийн үгийн сан боловсронгуй болно.

• Хэлний дөрвөн чадвар жигд хөгжиж, боловсролын үр өгөөж нэмэгдэнэ.

• Монгол өв соёлыг цахим орчинд дэлгэрүүлэх боломж бүрдэнэ.

• Хүүхдийн уншаад ойлгох чадвар сайжирна.

• Боловсролын тэгш байдлын бодит нэг алхам болно

Энэ удаагийн хэлэлцүүлэг нь шинэчлэн батлагдсан сургалтын хөтөлбөртэй холбон эцэслэж, толь бичиг боловсруулан гаргахад чиглэгдэж байгаагаараа ач холбогдолтой юм.