МОНГОЛ УЛСЫН ЕРӨНХИЙ БОЛОВСРОЛЫН СУРГУУЛИЙН СУРГАЛТЫН ХӨТӨЛБӨРИЙГ БОЛОВСРУУЛАХ, ХЭРЭГЖҮҮЛЭХ, ҮНЭЛЭХ ҮЙЛ ЯВЦЫН ТАЙЛАН

Үндэслэл, зорилго

Монгол Улсын боловсролын салбарт бүтэц, зохион байгуулалтын томоохон өөрчлөлт 1990-ээд оноос эрчимтэй хийгдэж иржээ. Тухайлбал, 2004 онд цогц чадамжид суурилсан боловсролын стандартыг боловсруулж үндэсний хэмжээнд хэрэгжүүлсэн бол 2005 оноос 10 жилийн тогтолцооноос 11 жилийн тогтолцоонд, 2008 оноос 11 жилийн тогтолцооноос 12 жилийн тогтолцоонд шилжсэн байна. Энэхүү боловсролын бүтцийн болон бодлогын өөрчлөлтийг даган ерөнхий боловсролын сургуулийн сургалтын хөтөлбөрийг хэд хэдэн удаа шинэчлэн боловсруулж, хэрэгжүүлжээ.

Богино хугацаанд шинэчлэгдсэн сургалтын хөтөлбөрийг даган боловсролын тогтолцооны тогтвортой, уялдаатай, нэгдмэл, цогц байдал зэрэг асуудал хөндөгдсөөр ирсэн. Эдгээр асуудлын цаана нэгдмэл ойлголт, нэгдсэн төлөвлөлт, нөөцийн хуваарилалт, гүйцэтгэл, үр дүн, сайжруулалт зэрэг асуудлыг зайлшгүй авч үзэх шаардлагатай.

Монгол Улсын боловсролын цаашид хийх шинэчлэл, сургалтын хөтөлбөрийг сайжруулах үйл ажиллагааны төлөвлөгөө, удирдамж, аргачлал боловсруулах хэрэгцээг үндэслэн энэхүү тайланг боловсрууллаа. Уг тайлангийн зорилго нь боловсролын тогтолцооны нэгдмэл, цогц, тогтвортой байдлыг ханган хөтөлбөрийн менежментийг сайжруулах санал, зөвлөмж боловсруулахад оршино.

Үүний тулд 2012 оноос өнөөг хүртэлх сургалтын цөм хөтөлбөр, сурах бичиг боловсруулах, хэрэгжүүлэх, үнэлэх үйл ажиллагааны талаарх мэдээ, баримт цуглуулан, эмхтгэн цэгцэлж, давуу, сул талыг дүгнэн, тулгамдсан асуудлыг илрүүлж, түүнээс гарах шийдэл саналыг дэвшүүлсэнийг онцлон тэмдэглэж байна.

Мэдээлэл цуглуулсан үйл явц

2012-2016 онд сургалтын хөтөлбөр, сурах бичиг боловсруулж, хэрэгжүүлэх үйл ажиллагаанд оролцож байсан хүмүүсийн хүрээнд 3 өдрийн дадлага ажлыг зохион байгуулан, цуглуулсан мэдээлэл дээр тулгуурлав. Дадлага ажилд боловсролын байгууллагуудаас нийт 73 хүн оролцсон. Үүнд: БСШУСЯ-1, БХ-13, БМДИ-16, БҮТ-10, МУИС-6, МУБИС-6, Хэрэгжилтийн баг-6, Бусад-15

Энэхүү 3 өдрийн дадлага ажлаар сургалтын хөтөлбөрийн шинэчлэлд оролцож байсан багийн гишүүдээс мэдээлэл цуглуулсан хэдий ч дараагийн шатанд мэргэжлийн байгууллагын төлөөлөл мэдээллийг дахин нягталсан болно.

Мэдээллийн хязгаарлалт: Боловсролын асуудал эрхэлсэн төрийн захиргааны болон мэргэжлийн байгууллагын мэдээллийн санд өнгөрсөн хугацаанд хийгдсэн хөтөлбөрийн шинэчлэлийн үйл явцын талаарх мэдээ баримтууд системчлэгдэн хуримтлагдаагүйн улмаас тухайн үйл явцад оролцож байсан багийн гишүүдэд байсан мэдээлэлд үндэслэсэн болно.

Мөн сургалтын цөм хөтөлбөрийг шинэчлэн боловсруулах, хэрэгжүүлэх, үнэлэх, сайжруулах үйл явцыг төлөвлөсөн үйл ажиллагааны зардлын тухай мэдээлэл хязгаарлагдмал байсан учир санхүүгийн тооцоо, түүнд дүгнэлт хийх боломжгүй байсныг дурдах нь зүйтэй.

Мэдээллийг эмхлэн цэгцэлсэн арга аргачлал

2012 оноос Монгол Улсын бага, дунд боловсролд хэрэгжүүлсэн Боловсролын чанарын шинэчлэлийн хүрээнд сургалтын цөм хөтөлбөр боловсруулах, сурах бичиг зохиох, сургуулиудад хэрэгжүүлэх, үнэлэх үйл ажиллагааны талаарх баримт мэдээлэлд тулгуурлан тухайн үед хийгдэж байсан ажлуудыг “PDСA” (Plan-Do-Check-Action) загварыг ашиглан “Үйл ажиллагааны дарааллын бүтэц” /Work Breakdown Structure/ аргачлалын дагуу эмхтгэн цэгцлэв.

Мэдээллийг эмхтгэн цэгцлэхдээ үйл ажиллагааны дарааллын дагуу “Phase-Activity-Task-Subtask” гэсэн хүснэгтийн загварыг ашиглан “Ажлын хүснэгт” боловсруулсан. Энэхүү ажлын хүснэгт дэх мэдээллийг үндэслэн өнгөрсөн хугацаанд хийсэн ажлын ололт, амжилт, алдаа оноо, цаашид сайжруулах саналыг боловсруулсан болно.

Мэдээлэл цуглуулан, эмхлэн цэгцлэхдээ дараах загварыг ашигласан болно.